"Colantes combativos", um mes na rede

Hoje, 22 de Novembro, Colantes combativos cumpre um mes na rede e toca parabenizar-se de termos chegado até aquí. Nom é muito tempo, mas desde que começamos a nossa andaina figemos um trabalho continuado e diário digitalizando colantes reivindicativos e ponhendo-os a dispossiçom de todas vós. Nom é o nosso um blogue de informaçom senom que pretende ser um blogue de documentaçom e consulta e ainda queda por diante muito mais trabalho do que levamos feito. Mas, a valorizaçom deste pequeno espaço de tempo na rede nom podia ser mais possitiva.

Quando pensavamos em fazer o blogue nom contavamos co sucesso que está tendo o nosso sítio em internet. Neste mês conseguimos superar as 5000 visualizaçons do blogue, o que fai umha média de perto de 200 vissitas diárias. Se temos em conta que nom habia nengum precedente dumha página deste tipo parece-nos importante o seguimento que está a ter. Já temos comentado aquí que pensavamos que Colantes combativos ia ser seguido nada mais que por um restringido grupo de coleccionadoras de adesivos, mas o certo é que chegamos a umha cantidade modesta de público heterogeneo.

Neste tempo subimos à rede mais de 300 autocolantes do tecido associativo e político do País. O que fai umha média de mais de 10 autocolantes por dia, aínda que muitas vezes tenhem sido mais e nunca menos de tres. Dizer-vos que o trabalho vamo-lo fazendo sobre a marcha; é dizer nom tinhamos digitalizado previamente o material. O que fai que requira certo tempo e dedicaçom escanear e tratar os arquivos, de aí que vaiamos subindo-os aos poucos. Levamos muitas horas diante do computador para que podades visualizar a nossa colecçom, mas é um trabalho que fazemos de bo agrado, mais tendo em conta a boa acolhida que estamos tendo.

Temos várias ideias em mente para melhorar os conteúdos do blogue, que iredes conhecendo sobre a marcha. O que si podemos adiantar é que pretendemos continuar coas postagens diárias ainda que tenhamos que reduzir o seu número. E ainda mantendo o ritmo actual de publicaçom, temos para meses e meses -ou anos- antes de rematar co nosso arquivo de colantes. E nom só o nosso arquivo, senom que andamos à procura dos arquivos de colantes de outros coleccionadores para que, umha vez rematemos os nossos, seguir subindo os deles e cubrindo assim melhor as décadas precedentes aos anos 90. 

O seguimento que está tendo o nosso trabalho nom teria sido possível sem a difussom que houvo na rede por parte dos meios digitais informativos alternativos. Desde estas páginas já temos comentado da entrevista que nos figera galizalivre.org quando levavamos só 10 dias na rede, mas nom foi este o único meio em fazer-se eco do nosso blogue senom que também foi reproduzida noutros portais: o Diário Liberdade, Galiza Indymedia, o portal Chuza! e a CiberIrmandade da Fala; além de terem ligado para nós diversas páginas e blogues de autocolantes, amigos nossos. Ademais, apesar de nom estarmos presentes em Facebook ou noutras redes sociais sabemos que temos um importante número de visitantes que conhecerom o blogue por estes meios. Agradecemos a gente achegada nossa que se preocupou de que estiveramos presentes nestas redes sociais.

A repercussom que tivérom estas informaçons na difussom da nossa iniciativa é innegável. Basta dizer que o dia em que aparesceu publicada a entrevista em vários destes meios, ultrapassamos as mil vissitas ao blogue. Mas nós tampouco dependemos de audiências e sabemos que essas cifras som fitos pontuais. Como digemos ao começo o nosso é um projecto de consulta a meio praço. Agora bem, tampouco imos negar que nos ilussiona e anima ter generado tanta curiosidade e expectativas, que também se plasmam nos correios de felicitaçons recebidos neste tempo.

Mais nada, compas. Só nos queda ameazar com que ha Colantes combativos para longo e pedirvos umha vez mais colaboraçom enviando-nos autocolantes ou fazendo-nos chegar as vossas críticas, sugestons e comentários. Obrigado pola vossa fidelidade e apoio recibido.